Дар шаш моҳаи аввали соли ҷорӣ аз ноҳияи Мир Сайид Алии Ҳамадонӣ 500 тонна маҳсулоти кишоварзӣ ба хориҷи кишвар содирот шудааст. Фаррухиддин Набизода, раиси ноҳия, зимни нишаст хабар дод.

Дар ин нимсола ҳаҷми истеҳсоли маҳсулоти кишоварзӣ 803 миллиону 339,6 ҳазор сомониро ташкил дод, ки афзоиш нисбат ба соли қаблӣ 7,7 фоиз зиёд мебошад.

Дар майдони 12 ҳазору 992 гектар кишти зироатҳо ба роҳ монда шудааст, ки нисбати соли 2025-ум 44 гектар зиёд аст. Аз ҷумла, пахта 5946 гектар, ғалладонагӣ ва лубиёгиҳо 4468 га, картошка 266 га, сабзавот 903 га, полезӣ 571 га ва зироати хӯроки чорво 777 гектарро ташкил медиҳад.

Истеҳсоли ғалладонагӣ 17891,1 тонна, картошка - 6278,5, сабзавот -51635,2, полезӣ 22150,8, мевагӣ - 9653,1, асал - 8,5, моҳӣ - 77,2 тонна ва тухм бошад 3,7 млн. донаро ташкил дод.

Исломи РАҶАБАЛӢ,

«Садои мардум»

Дар шаш моҳи аввали соли равон дар ноҳияи Балҷувон 30,4 тонна асал, 2059 тонна гӯшт, 1132 тонна шир ва 2 тонна моҳӣ истеҳсол шудааст. Дар ин бора раиси ноҳия Бахтиёр Сафарзода иттилоъ дод.

Дар ноҳия теъдоди чорвои калон ба 43 ҳазору 272 сар, гӯсфанду буз 96 ҳазору 526 сар, парранда 66 ҳазору 763 сар, асп 4269 сар, қутос 111 сар ва занбӯри асал бошад, ба 1497 оила расидааст.

Ҳамчунин, дар давраи сипаришуда истеҳсоли маҳсулоти кишоварзӣ ба 123,3 млн. сомонӣ расидааст, ки нисбати ҳамин давраи соли 2025-ум 14,1 миллион сомонӣ зиёд мебошад.

Исломи РАҶАБАЛӢ,

«Садои мардум»

Дар шаш моҳи соли ҷорӣ соҳаи саноати ноҳияи Фирдавсии шаҳри Душанбе рушди назаррас дошта, ҳаҷми умумии маҳсулоти истеҳсолшуда ба 970,1 миллион сомонӣ расидааст. Ин нишондиҳанда нисбат ба ҳамин давраи соли гузашта 85,7 миллион сомонӣ зиёд буда, асосан, аз ҳисоби афзоиши истеҳсол дар бахшҳои коркард, дӯзандагӣ, саноати хӯрокворӣ, сохтмон ва корхонаҳои истеҳсоли масолеҳи сохтмонӣ таъмин гардидааст. Ин нуктарои раиси ноҳияи Фирдавсӣ Дилшод Сафарзода 15-уми июли соли 2026 зимни нишасти матбуотӣ зикр кард.

Дар ин муддат 10 коргоҳу корхонаи нави саноатӣ ба қайд гирифта шуда, 5372 ҷойи нави кор ташкил гардидааст, ки нисбат ба ҳамин давраи соли гузашта 224 ҷой бештар мебошад. Дар ноҳия ҳаҷми содироти маҳсулоти саноатӣ ба 10,4 миллион доллари ИМА расида, нисбат ба ҳамин давраи соли гузашта 2,6 миллион доллар афзоиш ёфтааст.

- Бо мақсади густариши иқтидори истеҳсолӣ ва беҳтар намудани сатҳи хизматрасонӣ сохтмони биноҳои истиқоматии баландошёна, муассисаҳои таҳсилоти миёнаи умумӣ ва томактабӣ, навсозӣ ва муҷаҳҳазгардонии корхонаҳои саноатӣ, инчунин, бунёди марказҳои савдову хизматрасонӣ ва гулгаштҳо идома дошта, дар натиҷаи амалисозии онҳо ҳазорҳо ҷойи кори мавсимӣ ва доимӣ таъсис дода мешавад, - афзуд Дилшод ­Сафарзода.

Фархунда АБДУЛҲАКИМОВА,

«Садои мардум»

Дар шаш моҳи соли 2026 ҳаҷми истеҳсоли маҳсулоти кишоварзӣ дар шаҳру ноҳияҳои минтақаи Кӯлоб ба 5 миллиарду 469 миллиону 661 ҳазору 400 сомонӣ расидааст, ки ин нишондиҳанда нисбат ба ҳамин давраи соли гузашта 108,6 фоиз зиёд аст. Ин нуктаро Дилшоди Давлаталӣ, сардори раёсати кишоварзӣ минтақаи Кӯлоб, 28 июли соли ҷорӣ зимни нишасти матбуотӣ иттилоъ дод.

Кишоварзони шаҳру ноҳияҳои минтақаи Кӯлоб дар майдони 143 ҳазору 117 гектар кишти зироатҳои кишоварзиро анҷом дода, нақшаро 103 фоиз иҷро намудаанд.

Дар давраи сипаришуда истеҳсоли маҳсулоти асосии кишоварзӣ низ афзоиш ёфтааст. Аз ҷумла, 165 ҳазору 757 тонна ғалладона, 163 ҳазору 873 сабзавот, 28 ҳазору 23 картошка, 120 ҳазору 782 полезӣ, 44 ҳазору 271 мевагӣ ва 184 тонна ангур истеҳсол гардидааст.

Ҳоло дар минтақа чорвои калони шохдор ба 503 ҳазору 556 сар, чорвои майда ба 1 миллиону 638 ҳазору 678 сар, паранда 1 миллиону 109 ҳазору 937 сар ва оилаҳои занбӯри асал бошад, ба 38 ҳазору 488 адад расидааст.

- Дар минтақаи Кӯлоб 116 хоҷагии моҳипарварӣ, 28 фермаи парандапарварӣ, 16 хоҷагии зотпарварӣ ва 56 нуқтаи бордоркунии сунъии чорво фаъолият доранд, - гуфт ӯ.

Исломи РАҶАБАЛӢ,

«Садои мардум»

Истиқлоли давлатӣ барои Ҷумҳурии Тоҷикистон як рӯйдоди муҳими сиёсӣ, оғози марҳилаи сифатан нави рушди давлатдорӣ, эҳёи арзишҳои миллӣ ва фароҳам омадани имкониятҳои васеи иқтисодиву иҷтимоӣ гардид. Дар тӯли сиву панҷ соли соҳибистиқлолӣ бо роҳбарии хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Тоҷикистон аз як кишвари навистиқлол ба давлати рӯ ба рушд табдил ёфт, ки имрӯз дар арсаи байналмилалӣ бо ташаббусҳои созанда ва дастовардҳои назаррас эътироф шудааст.

Маҳз дар замони истиқлол сиёсати давлат ба рушди мутавозини ҳамаи минтақаҳои кишвар равона гардида, барои ободонии ноҳия­ҳои дурдасти кӯҳистон тадбирҳои муас­сир амалӣ шуданд. Агар солҳои аввали истиқлолият аксари чунин минтақаҳо бо мушкилоти ҷиддии иҷтимоӣ ва инфрасохторӣ рӯ ба рӯ буданд, имрӯз онҳо ба марказҳои созандагиву бунёдкорӣ мубаддал гардидаанд.

Ноҳияи Кӯҳистони Мастчоҳ аз ҷумлаи ҳамин минтақаҳо мебошад. Ин ноҳияи баландкӯҳ, ки табиати зебову захираҳои бойи табиӣ дорад, солҳои пеш бо мушкилоти роҳ, маҳдуд будани неруи барқ, дастрасии нокифоя ба хизматрасониҳои иҷтимоӣ ва имкониятҳои иқтисодӣ маълум буд. Аммо имрӯз симои ноҳия куллан дигар шудааст. Роҳҳои нав, муассисаҳои таълимӣ ва тандурустии замонавӣ, иншооти фарҳангиву варзиш, хатҳои барқ ва оби нӯшокӣ, коргоҳҳои истеҳсолӣ ва дигар иншооти муҳими иҷтимоӣ аз он шаҳодат медиҳанд, ки сиёсати бунёдкоронаи давлат дар ин минтақа низ натиҷаҳои назаррас ба бор овардааст.

Боиси ифтихор аст, ки сокинони ноҳияи Кӯҳистони Мастчоҳ Ҷашни 35-солагии Истиқлоли давлатии Ҷумҳурии Тоҷикистонро бо дастовардҳои арзандаи меҳнатӣ истиқбол мегиранд. Омодагиҳо ба ин ҷашни бузурги миллӣ дар ноҳия танҳо ба баргузории чорабиниҳои фарҳангӣ маҳдуд нашуда, пеш аз ҳама, дар бунёди иншооти муҳими иҷтимоӣ ва истеҳсолӣ, беҳтар намудани сатҳи зиндагии мардум ва рушди инфрасохтори маҳаллӣ таҷассум ёфтааст. Тавре раиси ноҳия Хайрулло Бобозода зимни нишасти матбуотӣ 30 июли соли 2026 иттилоъ дод, нақшаи чорабиниҳои ҷашнӣ пурра иҷро ва аз нишондиҳандаҳои пешбинишуда зиёд таъмин шудааст. Ба истиқболи 35-солагии Истиқлоли давлатии Ҷумҳурии Тоҷикистон дар ноҳия аз ҳисоби ҳамаи сарчашмаҳои маблағгузорӣ 116 иншооти таъиноти гуногун мавриди истифода қарор гирифтааст, ки ба 100,8 фоизи нақшаи пешбинишуда баробар аст.

Паси ҳар як иншооти сохташуда зиндагии беҳтари мардум, имкониятҳои нави таҳсилу табобат, рушди соҳибкорӣ ва фароҳам омадани ҷойҳои нави кор қарор дорад. Аз ҷумла, дар ин давра 16 иншооти соҳаи маориф, 12 муассисаи тандурустӣ, 36 иншооти кишоварзӣ, 11 иншооти соҳибкорӣ, 3 коргоҳи саноатӣ, 4 неругоҳи хурди барқи обӣ, 5 иншоот барои ҷавонону соҳаи варзиш, 4 иншооти таъминоти оби нӯшокӣ ва даҳҳо иншооти дигари иҷтимоӣ бунёд гардидаанд.

Ҳоло сохтмони ҳафт иншооти дигар идома дошта, онҳо низ дар арафаи Ҷашни Истиқлоли давлатӣ мавриди баҳрабардорӣ қарор хоҳанд гирифт.

Яке аз самтҳои муҳим рушди соҳаи энергетика мебошад. Барои минтақаҳои кӯҳистон дастрасӣ ба неруи барқи доимӣ омили асосии рушди иқтисодӣ, фаъолияти муассисаҳои иҷтимоӣ ва беҳтар шудани сатҳи зиндагии мардум ба шумор меравад. Дар ин самт яке аз рӯйдодҳои муҳимтарин барқрасонӣ ба деҳаҳои Ғурфкат, Арнохун ва Сурхкат мебошад. Солҳои зиёд сокинони ин деҳаҳо шабҳоро дар торикӣ сипарӣ мекарданд. Наслҳои зиёде бо умеди рӯзе зиндагӣ доштанд, ки чароғи хонаҳояшон рӯзе аз неруи барқи доимӣ равшан мешавад.

Бо татбиқи сиёсати иҷтимоии давлат ин орзу ба воқеият табдил ёфт. Аз соли 2020 сохт­мони хати баландшиддати интиқоли неруи барқ оғоз гардида, дар муддати кӯтоҳ беш аз ҳашт километр хати нави барқ кашида шуд. Санаи 23 июли соли 2023 сокинони ин се деҳа бори аввал ба шабакаи ягонаи барқи доимӣ пайваст гардиданд.

Ин рӯйдод барои сокинон танҳо мавриди истифода қарор гирифтани як иншооти муҳандисӣ набуд. Он оғози зиндагии нав, расидан ба умед ва нишонаи равшани ғамхории давлат нисбат ба сокинони минтақаҳои дурдаст гардид.

Маврид ба зикр аст, ки рушди устувори ҳар як минтақа, пеш аз ҳама, ба сатҳи соҳаи маориф вобаста аст. Аз ҳамин ҷост, ки дар сиёсати иҷтимоии давлат маориф яке аз самтҳои афзалиятнок маҳсуб меёбад. Дар даврони соҳиб­истиқлолӣ дар ноҳияи Кӯҳистони Мастчоҳ даҳҳо муассисаи таълимӣ бунёду навсозӣ гардида, синфхонаҳои иловагӣ сохта шуданд. Муассисаҳои таълимӣ бо таҷҳизоти замонавӣ, синф­хонаҳои фаннӣ, воситаҳои техникии таълим ва шароити беҳтари таҳсил таъмин гардида, барои тарбияи насли соҳибмаърифату ватандӯст заминаи мусоид фароҳам омад. Самараи ин тадбирҳо имрӯз ба хубӣ эҳсос мегардад. Хонандагони муассисаҳои ноҳия ҳамасола дар озмунҳои ҷумҳуриявии «Фурӯғи субҳи доноӣ китоб аст», «Илм – фурӯғи маърифат», олимпиадаҳои фаннӣ ва дигар чорабиниҳои сатҳи ҷумҳуриявӣ иштироки фаъол дошта, соҳиби ҷойҳои ифтихорӣ мешаванд. Ин дас­товардҳо нишон медиҳанд, ки сармоягузорӣ ба соҳаи маориф, дарвоқеъ, сармоягузорӣ ба ояндаи давлат ва миллат мебошад.

Дар баробари ин, соҳаи тандурустӣ низ тайи солҳои соҳибистиқлолӣ ба дастовардҳои назаррас ноил гардид. Бо дастгирии Ҳукумати Ҷумҳурии Тоҷикистон муассисаҳои тиббии ноҳия таъмиру навсозӣ шуда, бо таҷҳизоти муосир таъмин гардиданд. Татбиқи барномаҳои давлатӣ ва баланд бардоштани сатҳи хизматрасонии тиббӣ имкон дод, ки дастрасии аҳолӣ ба хизматрасонии босифати тиббӣ беҳтар гардад. Имрӯз барои сокинони ноҳия имконият­ҳои ташхису муолиҷа нисбат ба солҳои пеш бамаротиб фарохтар шудаанд.

Соҳаи кишоварзӣ низ, ки такягоҳи асосии иқтисодиёти ноҳия маҳсуб меёбад, дар партави истиқлол рушду такомул ёфтааст. Бо истифода аз таҷрибаи пешқадам ва технологияҳои муосир деҳқонон ҳаҷми истеҳсоли картошка, ғалладона, маҳсулоти боғдорӣ, чорводорӣ ва занбӯриасалпарвариро афзоиш додаанд. Ҳамзамон, рушди соҳибкории хурду миёна, таъсиси коргоҳҳои истеҳсолӣ ва дастгирии ташаббусҳои соҳибкорон барои таъсиси ҷойҳои нави кор ва беҳтар гардидани сатҳи зиндагии аҳолӣ мусоидат намудааст.

Дар солҳои охир таваҷҷуҳ ба рушди саноат низ бештар гардидааст. Ба истифода додани коргоҳҳои нави истеҳсолӣ на танҳо ба афзоиши ҳаҷми маҳсулоти ватанӣ мусоидат мекунад, балки барои бо ҷойи кори доимӣ таъмин гардидани ҷавонон низ замина мегузорад. Ин раванд дар доираи ҳадафи чоруми стратегии кишвар - саноатикунонии босуръати мамлакат аҳамияти махсус дорад.

Яке аз омилҳои муҳими пешрафту сарсаб­зии ноҳия иштироки фаъоли худи сокинон дар корҳои ободониву созандагӣ мебошад. Дар бисёр деҳаҳо мардум бо ҳисси баланди ватандӯстӣ ва масъулияти шаҳрвандӣ дар таъмири роҳҳо, кабудизоркунии маҳалҳо, бунёди иншооти иҷтимоӣ ва беҳтар намудани шароити зиндагӣ саҳми арзанда мегузоранд. Ин ҳамбастагӣ нишон медиҳад, ки ободии Ватан танҳо вазифаи давлат нест, балки рисолати ҳар як шаҳрванди соҳибватан мебошад.

Намунаи равшани чунин ташаббусҳоро метавон дар деҳаи Оббурдон мушоҳида кард. Сокинони деҳа бо дастгирии муассисаи нигоҳдории роҳҳои автомобилгарди ноҳия роҳи марказии деҳаро ободу ҳамвор намуда, бо меҳнати дастҷамъона фарҳанги баланди шаҳрвандӣ ва ҳисси масъулияти худро нисбат ба ободии маҳал нишон доданд. Чунин иқдомҳои созанда имрӯз дар дигар деҳаҳои ноҳия низ зиёд шуда, ба ҳусни маҳал ва беҳтар гардидани шароити зиндагии мардум мусоидат менамоянд.

Таваҷҷуҳ ба ҷавонон ва соҳаи варзиш низ аз самтҳои муҳими сиёсати иҷтимоии давлат ба ҳисоб меравад. Дар солҳои соҳиб­истиқлолӣ дар ноҳия майдончаҳои варзиш ва дигар иншооти соҳа бунёд гардида, барои тарбияи ҷисмониву маънавии наврасону ҷавонон имкониятҳои бештар муҳайё шудаанд. Ҷавонони ноҳия дар мусобиқаҳои гуногун ва чорабиниҳои фарҳангиву маърифатӣ иштироки фаъол дошта, дар муаррифии ноҳияи худ саҳми арзанда мегузоранд.

Имрӯз, вақте ба дастовардҳои ноҳияи Кӯҳистони Мастчоҳ назар меафканем, равшан эҳсос мегардад, ки ҳамаи онҳо самараи Истиқлоли давлатӣ, сулҳу субот ва сиёсати бунёдкоронаи Пешвои миллат муҳтарам ­Эмомалӣ Раҳмон мебошанд. Иҷрои беш аз сад фоизи нақшаи бунёди иншооти ҷашнӣ, рушди бемайлони соҳаҳои иқтисодиву иҷтимоӣ, беҳтар гардидани сифати зиндагии мардум ва иштироки фаъоли сокинон дар корҳои созандагӣ аз он шаҳодат медиҳанд, ки ноҳияи Кӯҳистони Мастчоҳ имрӯз бо қадамҳои устувор роҳи пешрафтро идома медиҳад.

Ҷашни 35-солагии Истиқлоли давлатии Ҷумҳурии Тоҷикистон барои сокинони ин ноҳияи кӯҳистон фурсате барои афзудани корҳои созандагӣ, меҳнати содиқона ва талошҳои пайваста барои ободии диёр мебошад. Бо чунин руҳияи ватандӯстона ва азми қавӣ мардуми сарбаланди Кӯҳистони Мастчоҳ омодаанд, ки дар оянда низ барои таҳкими дастовардҳои истиқлол, рушди Тоҷикистони соҳибистиқлол ва баланд бардоштани обрӯи Ватани азиз дар арсаи ҷаҳон саҳми бештар гузоранд.

Ҷамшеди САБОҲИДДИН,

«Садои мардум»

Дар шаҳру ноҳияҳои картошкапарвари вилояти Суғд мавсими ҷамъоварии ҳосили картошкаи барвақтӣ ба марҳилаи ниҳоии худ расидааст. Дар саҳроҳои шаҳрҳои Панҷакент, Истаравшан, ноҳияҳои Деваштич ва дигар минтақаҳои картошкапарвар деҳқонон аз шароити мусоиди обу ҳаво самаранок истифода бурда, бо ҷамъоварии ҳосил ба омодасозии замин барои кишти такрорӣ машғуланд.

Картошкапарварӣ яке аз бахшҳои муҳими соҳаи кишоварзии вилояти Суғд ба ҳисоб рафта, дар таъмини амнияти озуқаворӣ саҳми бориз дорад. Ба шарофати дастгирии Ҳукумати Ҷумҳурии Тоҷикистон, истифодаи тухмиҳои серҳосил, технологияҳои муосир ва риояи талаботи агротехникӣ ҳосилнокии майдонҳои картошка солҳои охир афзоиши назаррас ёфтааст. Бино ба иттилои Сарраёсати кишоварзии вилояти Суғд, соли ҷорӣ дар майдони 20 ҳазору 842 гектар картошка кишт шуда буд, ки аз ин 1000 гектар ба картошкаи барвақтӣ рост меояд.

То имрӯз дар вилоят зиёда аз 62 ҳазору 800 тонна картошка ҷамъоварӣ гардидааст, ки аз ин 47 ҳазору 900 тонна ба хоҷагиҳои деҳқонӣ рост меояд.

Ҳамзамон, кишти такрорӣ низ дар вилоят босуръат идома дорад. Тибқи нақша, имсол дар майдони 17 ҳазору 220 гектар кишти такрорӣ анҷом дода мешавад.

Дар ин самт кишоварзони ноҳияи Ҷаббор Расулов пешсаф мебошанд. Ба иттилои сардори раёсати кишоварзии ноҳия Шуҳрат Аҳмадов, кишти такрорӣ дар 2985 гектар ба нақша гирифта шуда, то имрӯз дар 1449 гектар иҷро гардидааст. Дар заминҳои аз кишти аввал холишуда, асосан, ҷуворимакка, лӯбиёгӣ, сабзавот ва хӯроки чорво кишт мешаванд.

Мутахассисони соҳа бовар доранд, ки ҷамъоварии саривақтии ҳосил ва истифодаи самараноки заминҳои корам барои афзоиши истеҳсоли маҳсулоти кишоварзӣ, таҳкими амнияти озуқаворӣ ва таъмини бозори кишвар бо маҳсулоти хушсифати ватанӣ аҳамият дорад. Бо чунин суръати кор интизор меравад, ки кишоварзони вилояти Суғд нақшаи ҷамъоварии картошкаи барвақтӣ ва кишти такрориро пурра иҷро намоянд.

Н. ТУРСУНОВ,

«Садои мардум»

Дар доираи иқдоми маърифатӣ ва иттилоотии «Суғд дар 35 соли Истиқлоли давлатии Ҷумҳурии Тоҷикистон» корвони журналистон ин навбат ба шаҳри Гулистон сафар намуд. Ҳадафи асосии сафар шиносоӣ бо дас­товардҳои иҷтимоию иқтисодӣ, раванди корҳои ободониву созандагӣ ва омодагии шаҳр ба Ҷашни 35-солагии Истиқлоли давлатии Ҷумҳурии Тоҷикистон буд. Мо - рӯзноманигорон аз як қатор иншооти истеҳсолӣ ва иҷтимоӣ боздид намуда, ба натиҷаҳои рушди шаҳр аз наздик ошно шудем.

Яке аз корхонаҳое, ки аснои сафар аз он боздид намудем, «Қолинҳои Қайроққум» мебошад. Он бузургтарин корхонаи истеҳсоли қолин ва маҳсулоти қолин дар Тоҷикистон ба шумор рафта, дар тӯли 65 соли фаъолият таҷрибаи ғанӣ ва эътибори баландро соҳиб гардидааст.

Маҳсулоти корхона бо сифати баланд, нақшу нигори миллӣ, рангорангӣ ва мутобиқат ба талаботи бозори муосир фарқкунада мебошад. Дар ҳар як қолин зебоии табиати Тоҷикис­тон, анъана ва ҳунари қолинбофии миллӣ таҷассум ёфтааст. Ин аст, ки маҳсулоти корхона берун аз кишвар низ мавқеъ пайдо кардааст.

Дар солҳои Истиқлоли давлатӣ, бо дастгирии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам ­Эмомалӣ Раҳмон соҳаи саноат, аз ҷумла қолинбофӣ, ба марҳилаи нави рушд ворид гардид. Боздиди Пешвои миллат аз корхона дар солҳои 2013, 2018, 2021 ва 2023 барои кормандон рӯйдоди таърихӣ ва илҳомбахш гардид.

Эълон шудани саноатикунонии босуръати кишвар ҳамчун ҳадафи чоруми миллӣ ва солҳои 2022-2026 «Солҳои рушди саноат» барои фаъо­лияти корхона имкониятҳои нав фароҳам овард. Бо татбиқи «Барномаи рушди қолинбофӣ дар Ҷумҳурии Тоҷикистон» барои солҳои 2014-2020 ва 2021-2025 парки технологии корхона пурра таҷдид гардида, дастгоҳҳои навтарини истеҳсолӣ аз давлатҳои Олмон, Белгия, Туркия, Фаронса, Ҷопон, Россия, Австрия ва Ҳиндустон ворид ва насб шуданд, ки ин ба суръат ва сифати кор таъсири мусбат расонд. Агар истеҳсол солҳои 2013-2020-ум 1 миллиону 770 ҳазор м2-ро ташкил дода бошад, солҳои 2021-2025 ин нишондиҳанда ба 3 миллиону 186 ҳазор м2 расида, танҳо дар соли 2025 зиёда аз 3 миллиону 800 м2 маҳсулот истеҳсол гардидааст.

Аз соли 2013 то имрӯз дар доираи ҷалби сармояи хориҷӣ ва маблағгузории корхона хатҳои нави технологӣ насб шуданд, ки самаранокии онҳо нисбат ба дастгоҳҳои пешина то 20 маротиба бештар мебошад. Ин навсозӣ на танҳо ҳаҷми истеҳсолро зиёд кард, балки сифати маҳсулот ва рақобатпазирии онро дар бозорҳои дохилу хориҷ беҳтар намуд.

Қадами муҳими дигар ба роҳ мондани истеҳсоли ришта дар дохили корхона мебошад. То соли 2018 тамоми ашёи хоми зарурӣ аз хориҷ ворид мегардид. Аз моҳи майи соли 2018 истеҳсоли ришта ба роҳ монда шуд, ки ин имкон фароҳам овард имрӯз зиёда аз 60 фоизи ашёи хом дар корхона истеҳсол шавад. Ин иқдом арзиши аслии маҳсулотро коҳиш дода, ба истеҳсоли маҳсулоти воридивазкунанда ва таъсиси ҷойҳои нави кор мусоидат намуд.

Бо мақсади мутобиқ намудани маҳсулот ба талаботи бозор мутахассисони корхона ҳамарӯза нақшу нигор ва дизайнҳои нав таҳия мекунанд. Иқтидор ва имконияти корхона имкон медиҳанд фармоишҳои муштариён, новобаста аз ҳаҷм, андоза ва тарҳ, дар муҳлати кӯтоҳ иҷро шаванд.

Корхона барои муаррифии маҳсулоти худ дар аксари шаҳру ноҳияҳои ҷумҳурӣ намоишгоҳ ва ярмарка-фурӯш ташкил намуда, маҳсулоти худро бо тахфифи аз 20 то 50 фоиз пешниҳод менамояд. Ҳамчунин, қариб дар ҳамаи шаҳру ноҳияҳои ҷумҳурӣ нуқтаҳои фурӯши доимӣ таъсис дода шудааст, ки барои харидорон имконияти интихоби васеи маҳсулотро фароҳам меорад.

Муқоисаи натиҷаҳои солҳои 2013-2025 бозгӯи онанд, ки истеҳсол қариб се маротиба, музди миёнаи меҳнат 2 ва фонди музди меҳнат 4,2 маротиба, шумораи кормандон 2,2 ва пардохтҳо ба буҷет 10,2 маротиба афзудааст.

Самаранокии меҳнат низ чандин маротиба беҳтар шудааст. Агар соли 1991 ҳар як корманд ба ҳисоби миёна 1384 м2 маҳсулот истеҳсол мекард, соли 2025 ин нишондиҳанда ба 6824 м2 расидааст.

Ширкати «Қолинҳои Қайроққум» ба сифати маҳсулот таваҷҷуҳи хоса зоҳир мекунад. Ширкат дорои сертификати байналмилалии ИСО 9001 буда, борҳо ғолиби озмуни «Маҳсулот ва хизматрасонии беҳтарини Ҷумҳурии Тоҷикистон» гардидааст. Аз ҷумла, соли 2025 низ маҳсулоти корхона ба ин унвон сазовор дониста шуд.

Дар нимсолаи якуми соли 2026 дар корхона 2066,4ҳ. м2 маҳсулот истеҳсол гардид, ки нисбат ба ҳамин давраи соли 2025 163,8ҳ. м2 ё 8,6 фоиз зиёд мебошад. Истеҳсоли риштаҳои полипропиленӣ бошад, 956,7 тоннаро ташкил дод. Бо мақсади боз ҳам зиёд намудани истеҳсолот айни замон сехҳои асосӣ дар се баст фаъолият менамоянд.

Дар моҳи марти соли 2023 бо иштироки Пешвои миллат муҳтарам Эмомалӣ Раҳмон коргоҳи истеҳсоли рӯйпӯшҳои рӯифаршии тафтингии нақшин мавриди истифода қарор гирифт. Ин иқдом ба истеҳсоли маҳсулоти воридивазкунанда, афзоиши истеҳсолот ва таъсиси ҷойҳои нави кор заминаи мусоид фароҳам овард.

Корхона бо ширкатҳои Федератсияи Россия, ҷумҳуриҳои Қазоқистон, Қирғизистон ва Озарбойҷон ҳамкории судманд дошта, маҳсулоти худро ба ин кишварҳо содирот менамояд.

Содирот дар нимсолаи якуми соли 2026-ум 1 миллиону 715 ҳазор доллари ИМА-ро ташкил намуд, ки нисбат ба ҳамин давраи соли гузашта 360 ҳазор доллар ё 26,6 фоиз зиёд мебошад.

Дар маҷмуъ, «Қолинҳои Қайроққум» ҳамчун яке аз намунаҳои барҷастаи саноати муосири Тоҷикистон дар татбиқи ҳадафи чоруми миллӣ - саноатикунонии босуръати кишвар саҳми арзанда мегузорад.

Нодир ТУРСУНОВ,

«Садои мардум»

Таъсис додани корхонаҳои нави истеҳсолӣ барои коркарди пурраи ашёи хоми ватанӣ, хусусан маъдан, металл­ҳои ранга ва нодиру қиматбаҳо, аз вазифаҳои афзалиятноки Ҳукумати мамлакат арзёбӣ мегардад ва ин нуктаро Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паёми навбатӣ ба мақоми олии қонунбарори кишвар бори дигар таъкид ҳам намуданд ва дастур шуд, ки барои афзоиш додани ҳаҷми истеҳсоли маҳсулоти содиротӣ ва ивазкунандаи воридот чораандешию ҷалби сармоягузориҳои мустақим бояд дар ин самт тақвият дода шавад.

Бо назардошти аҳамияти хосу калидии соҳаи саноат дар рушди иқтисодиёти миллӣ саноатикунонии босуръат дар «Стратегияи милли рушд барои давраи то соли 2030» яке аз чаҳор ҳадафи стратегӣ муайян гардида, бо дастгириҳои доимии Ҳукумати мамлакат солҳои охир рушди соҳа дар Вилояти Мухтори Кӯҳистони Бадахшон вусъати тоза касб намудааст. Дар ин замина, бо назардошти мавқеи ҷуғрофӣ ва зарфиятҳои воқеии вилоят дар самти рушди саноат «Барномаи рушди саноати ВМКБ барои солҳои 2025-2030» таҳрезӣ гардид. Тавре мудири шуъбаи саноат, энергетика ва коммуникатсияи Мақомоти иҷроияи ҳокимияти давлатии ВМКБ Сураҷ Тоҳирҷонзода изҳор дошт, ҳоло дар ҳудуди вилоят беш аз 190 корхонаю коргоҳҳои саноатӣ фаъолият дошта, дар таъмини рушди устувори иқтисодии он саҳми назаррас доранд. Танҳо давоми панҷ соли охир дар ВМКБ 148 корхонаи саноатӣ бунёд шуданд ва ин, албатта, дастоварди арзанда ба ифтихори Ҷашни 35-умин солгарди Истиқлоли давлатии Ҷумҳурии Тоҷикистон мебошад.

- Бадахшон дорои захираҳои бойи табиӣ ва канданиҳои фоиданок буда, маҳз равнақбахшии саноати кӯҳӣ метавонад рушди иқтисодию иҷтимоии вилоятро ба сатҳи сифатан нави тараққиёт бароварда, барои ба кор андохтани иқтидорҳои нави истеҳсолӣ ва дар ин замина таъсис додани ҷойҳои иловагии кор мусоидат намояд, - гуфт номбурда.

Мувофиқи тавзеҳоти ӯ, дар ҳудуди вилоят 43 кон, 46 зуҳуроти маъдан бо 24 намуди канданиҳои фоиданок, ки дорои сангу металлҳои қиматбаҳоянд, муайян шудаанд. Дар баробари ин, аз рӯи маълумоти мутахассисони соҳа, дар вилоят зиёда аз 250 зуҳуроти канданиҳои фоиданок ба қайд гирифта шудааст. Дар ҳафт кони он корҳои истихроҷи маъдани кӯҳӣ, аз ҷумла тилло, нуқра, мармар ва хокаи мармар, ба роҳ монда шуда, ашёи хом аллакай коркарду маҳсулоти саноатӣ истеҳсол шуда истодааст.

«Барномаи давлатии рушди соҳаи геология барои солҳои 2021-2030» бо мақсади муайян намудани самтҳои асосии омӯзиши геологӣ, азнавбарқароркунӣ, истифода ва ҳифзи захираҳои табиӣ, назорати равандҳои хатарноки геологӣ, омӯзиш ва мониторинги обҳои зеризаминӣ таҳия гардида, мавриди амал қарор дода шудааст. Дар асоси барномаи мазкур КВД «Экспедитсияи иктишофии геологии Помир» корҳои иктишофӣ-геологиро роҳандозӣ намуда, айни замон дар мавзеъҳои Рангкӯли ноҳияи Мурғоб, Шазуди ноҳияи Шуғнон, Ахзев ва Шуҷанди ноҳияи Рӯшон барои муайян намудани мавҷудият ва захираи металлҳои нодир ва қиматбаҳо корҳои геологӣ-ҷустуҷӯиро пеш бурда истодааст.

Дар заминаи сиёсати «дарҳои кушод»-и кишварамон солҳои охир таваҷҷуҳи сармоягузорони хориҷӣ ба иқтисоди миллӣ афзуда, корхонаҳои муштарак, минҷумла дар соҳаи саноати кӯҳӣ, бо иштироки сармоягузорони хориҷӣ бунёд шуда истодаанд. Мисоли чунин ҳамкориҳо Корхонаи маъдангудозии муштарак миёни Тоҷикистону Чин дар ноҳияи Мурғоб «С.А. Минералз» аст. Корхонаи мазкур дар самти коркард ва истеҳсоли нуқра фаъолият дошта, теъдоди кормандон аз ҳисоби сокинони маҳаллӣ зиёда аз 100 нафарро ташкил медиҳанд.

Дар баробари ин, дар ноҳияи Дарвоз ҶДММ «Таком голд», ҶДММ «Шимшо» ва ҶДММ «Истиқлоли дурахшон» барои коркарди тилло ва металлҳои қиматбаҳо корхонаҳои истеҳсолӣ бунёд намуда, дар ташаккули маҷмуи маҳсулоти саноатии вилоят саҳми назаррас доранд.

Саноати кӯҳӣ барои иқтисодиёти вилоят ҳамчун омили такондиҳандаи рушди соҳа муайян гардидааст. Аз ин рӯ, ҳоло тибқи «Барномаи рушди иқтисодию иҷтимоии ВМКБ барои солҳои 2026-2030» корҳои иктишофӣ-ҷустуҷӯӣ дар конҳои Икар ва Барҷи ноҳияи Рӯшон ба нақша гирифта шуда, дар баробари ин, барои бунёди корхонаҳои коркард ва истеҳсоли литий дар ноҳияҳои Ишкошим ва Шуғнон лоиҳаҳо тарҳрезӣ шудаанд. Ҳамзамон, дар ноҳияи Ишкошим сохтмони корхонаи маъдангудозӣ аллакай оғоз гардид ва аз нисф зиёд корҳои сохтмонӣ анҷом дода шудаанд.

Тибқи маълумоти Вазорати молияи кишвар соли 2022 аз шахсони воқеии дорои иҷозатнома, ки бо усули «худфаъолӣ ва худбиёрӣ» дар вилоят фаъолият доштанд, ба маблағи 2243 510 сомонӣ тиллои пошхӯрда ва сангҳои қиматбаҳо харидорӣ шудааст. Дар соли 2024 танҳо аз ноҳияи Дарвоз ба маблағи 1196 478 сомонӣ маҳсулот ба хазинаи сарватҳои давлатӣ фурӯхта шуда, дар соли 2025 бошад, аз ин ноҳия ба маблағи 2042000 сомонӣ ва аз ноҳияи Ишкошим ба маблағи 95 000 сомонӣ, яъне дар умум, 2137000 сомонӣ маҳсулот ба хазинаи сарватҳои давлатӣ ворид шудааст.

Воқеан, давраҳои пеш ба чунин шуғлу кор ҷалб шудани шаҳрвандон аз бисёр ҷиҳатҳо номумкин буд, вале ташаббусҳои пайгиронаи Пешвои миллат муҳтарам Эмомалӣ Раҳмон имкон дод, то имрӯз дилхоҳ шаҳрванд бо шуғлу кори сазовор ва писандида иқдом намуда, дар пешравии зиндагии худ, наздикону оила ва, умуман, тамоми кишвар саҳми арзанда гузорад.

Машҳур ИМОМНАЗАР,

«Садои мардум»

Дар маҷлиси Ҳукумати Ҷумҳурии Тоҷикис­тон 30 июни соли 2026 «Барномаи нави рушди соҳаҳои кирмакпарварӣ ва коркарди пилла дар Ҷумҳурии Тоҷикистон барои солҳои 2026-2030» баррасӣ ва қабул шуд, ки қадами муҳим дар самти барқарор намудани мавқеи соҳа, бартараф кардани мушкилоти мавҷуда ва гузоштани заминаи рушди устувори он мебошад. Ҳадафи асосии барнома зиёд намудани истеҳсоли пилла, таъмини шуғли аҳолӣ, рушди содирот, ҷалби сармоягузорӣ ва муосир намудани технологияҳои коркарди пилла аст. Барнома панҷ самти асосиро фаро мегирад: ташкил ва рушди боғҳои тут, таъмини тухми босифати кирмак, такмили раванди парвариши кирмак, афзоиши истеҳсоли пилла ва ба роҳ мондани истеҳсоли маҳсулоти тайёр.

Тавре таҳлили мутахассисони соҳа оид ба вазъи соҳа нишон медиҳад, дар солҳои охир кирмакпарварӣ бо як қатор мушкилот рӯ ба рӯ гардидааст. Тибқи маълумоти оморӣ, агар соли 2021 дар ҷумҳурӣ 447 тонна пилла истеҳсол шуда бошад, пас ин нишондиҳанда соли 2022 ба 376, соли 2023 ба 213, соли 2024 ба 358 ва соли 2025 ба 243 тонна расидааст. Яъне, дар муқоиса ба соли 2021 истеҳсоли пилла соли 2025 беш аз ду баробар коҳиш ёфта, иҷроиш 54,9 фоизро ташкил додааст. Мутахассисон сабабҳои чунин вазъиятро гуногун арзёбӣ мекунанд. Пеш аз ҳама, коҳиши заминаи хӯроки кирмак, кам шудани майдони тутзор, нигоҳубини нокифояи дарахтони тут, риоя нагардидани баъзе талаботи агротехникии парвариши кирмак ба истеҳсоли пилла таъсири манфӣ расонидаанд.

Дарахти тут асоси рушди кирмакпарварӣ мебошад. Бе ташкили заминаи устувори хӯрока рушди соҳа имконнопазир аст. Бинобар ин, барои таҳкими базаи хӯроки кирмак тадбирҳои муайян амалӣ шуда, дар доираи барномаҳои қаблӣ аз Ҷумҳурии Ӯзбекистон ва Ҷумҳурии Мардумии Чин беш аз 2,3 миллион бех ниҳоли тут ворид гардида, ба хоҷагиҳои кирмакпарвар тақсим шудааст. Ҳамзамон, зиёда аз 500 ҳазор бех ниҳоли тути ватанӣ дастрас ва шинонида шудааст. Бо вуҷуди ин, бунёди тутзорҳои нав ҳанӯз ҳам таваҷҷуҳи бештарро талаб мекунад. Бино ба иттилои муовини директори ҶСК «Пиллаи тоҷик» Назиршо Назаров, аз 43 шаҳру ноҳияи пиллапарвари ҷумҳурӣ танҳо 9 шаҳру ноҳия барои бунёди тутзорҳо на кам аз 5 гектар замин ҷудо намудаанд. Ин ҳолат нишон медиҳад, ки дар самти иҷрои вазифаҳои муайяншуда ҳамкории сохторҳои масъул ва мақомоти маҳаллӣ бояд тақвият дода шавад.

- Дар натиҷаи ба фаъолият оғоз намудани коргоҳҳои нав дар заминаи ҶСК «Пиллаи тоҷик» имкони коркарди пурраи ашёи хоми маҳаллӣ ба вуҷуд омадааст. Агар солҳои қаблӣ қисми зиёди пилла танҳо ҳамчун ашёи хом истифода мешуд, имрӯз дар кишвар барои истеҳсоли маҳсулоти дорои арзиши иловашуда шароити зарурӣ фароҳам оварда мешавад. Ин раванд ба яке аз ҳадафҳои муҳими сиёсати саноатии мамлакат - гузариш аз содироти ашёи хом ба истеҳсол ва содироти маҳсулоти тайёр мувофиқат мекунад,- изҳор медорад муовини директори ҶСК «Пиллаи тоҷик» Муҳиддин Исомаддинов.

Бо вуҷуди пешравиҳои муайян рушди минбаъдаи соҳа тақозо мекунад, ки масъалаҳои мавҷуда ба таври системавӣ ҳал карда шаванд. Таҷрибаи амалигардонии барномаи қаблии рушди соҳа барои солҳои 2020–2024 нишон дод, ки танҳо қабули барнома ва муайян намудани нишондиҳандаҳо барои расидан ба ҳадафҳо кофӣ нест. Зарур аст, ки механизми татбиқ, назорати иҷро, ҳамоҳангсозии байни сохторҳо ва иштироки фаъолонаи хоҷагиҳои деҳқонӣ таъмин гардад. Тавре Назиршо Назаров гуфт, барои амалигардонии «Барномаи рушди соҳаҳои кирмакпарварӣ ва коркарди пилла барои солҳои 2020-2024»-ум 202 миллион сомонӣ пешбинӣ шуда буд. Мутаассифона, 82,9 миллион сомонӣ ё 41 фоиз маблағгузорӣ гардидааст. Аз 4375 тонна пиллаи пешбинишуда бошад, дар давраи мазкур ҳамагӣ 1832 тонна истеҳсол шудааст, ки 42 фоизи нақшаро ташкил медиҳад. Ин рақамҳо зарурати таҳияи барномаи навро бо назардошти таҷрибаи андӯхта ва мушкилоти воқеии соҳа ба миён овард.

«Барномаи рушди соҳаҳои кирмакпарварӣ ва коркарди пилла барои солҳои 2026-2030» бо мақсади ислоҳи камбудиҳои давраи гузашта таҳия гардидааст. Дар он масъалаҳои муҳим, аз қабили васеъ намудани майдони тутзорҳо, беҳтар намудани таъминоти тухми кирмак, баланд бардоштани ҳосилнокии парвариш, рушди коркарди саноатии пилла ва омода намудани мутахассисони соҳибтаҷриба, пешбинӣ шудаанд.

- Дар барномаи нав масъалаи рушди тутзорҳо низ ҷойгоҳи махсус дорад. Бунёди боғҳои нави тут бояд на танҳо аз рӯи миқдор, балки бо назардошти самаранокии истифодаи замин ва хусусияти иқлимии минтақаҳо амалӣ карда шавад. Истифодаи усулҳои муосири шинонидани тут, аз ҷумла тутзорҳои интенсивӣ бо шаклҳои гуногуни ҷойгиркунии ниҳолҳо, имкон медиҳад, ки аз як воҳиди замин бештар барг истеҳсол карда шавад. Дар ин самт, истифодаи навъҳои серҳосили тути ватанӣ муҳим аст. Тоҷикистон дорои захираи хуби генетикии тут мебошад ва олимони кишвар навъҳои мутобиқ ба шароити маҳаллиро офаридаанд. Аз ин рӯ, дар баробари воридоти таҷрибаи хориҷӣ бояд ба рушди истеҳсоли ниҳолҳои ватании босифат низ таваҷҷуҳи бештар зоҳир шавад, - мегӯяд Назиршо Назаров.

Ба андешаи мутахассисон, яке аз масъалаҳои калидии соҳа таъмини кирмакпарварон бо тухмии хушсифат мебошад. Таҷриба нишон медиҳад, ки сифати тухми кирмак ба ҳосилнокӣ ва сифати пилла таъсири мустақим дорад. Дар мавсими нави истеҳсолӣ ҶСК «Пиллаи тоҷик» аз Ҷумҳурии Мардумии Чин тибқи шартнома 17 ҳазору 200 қуттӣ тухми кирмаки хушсифат ворид намудааст. Ҳамзамон, барои дастгирии кирмакпарварон таҷҳизоти зарурӣ, аз ҷумла тухми кирмак, ҳароратсанҷ, намисанҷ, маводи безараргардонӣ, коғазҳои махсус ва дигар воситаҳо, пешниҳод мегарданд. Ин тадбирҳо метавонанд ба баланд гардидани масъулияти истеҳсолкунандагон ва беҳтар шудани сифати маҳсулоти ниҳоӣ мусоидат намоянд.

Соли ҷорӣ дар ҷумҳурӣ ҷамъоварии 430 тонна пиллаи тар ба нақша гирифта шудааст. То моҳи июли соли 2026-ум 323,91 тонна пилла истеҳсол гардид, ки нисбат ба соли 2025-ум 81,21 тонна зиёд мебошад. Ин нишондиҳанда метавонад оғози марҳилаи нави эҳёи соҳа бошад, аммо барои таъмини рушди устувор зарур аст, ки баланд бардоштани ҳосилнокӣ дар мадди аввал қарор гирад. Дар ин самт пешниҳодҳои олимони Маркази ҷумҳуриявии илмию таҳқиқотии пиллапарварӣ аҳамият доранд. Аз ҷумла, онҳо зарур мешуморанд, ки ҳамоҳангсозии илм бо истеҳсолот тақвият дода шуда, таҷрибаи кишварҳои пешрафтаи соҳа, аз қабили Чин, Ҳиндустон ва Корея, мавриди омӯзиш ва татбиқ қарор гирад.

Бунёди тутзорҳои интенсивӣ бо истифода аз навъҳои серҳосили ватании тут, ки аз ҷониби олимони соҳа офарида шудаанд, метавонад яке аз роҳҳои асосии ҳалли масъалаи таъмини базаи хӯроки кирмак бошад.

Дар ҳақиқат, ояндаи кирмакпарварӣ бе рушди заминаи илмӣ ва татбиқи технологияҳои муосир тасаввурнопазир аст. Имрӯз дар ҷаҳон усулҳои нави парвариши кирмак, истифодаи технологияҳои сарфакунандаи захираҳо, идоракунии рақамии равандҳои истеҳсолӣ ва селексияи навъҳои устувор васеъ истифода мешаванд. Бино ба таъкиди мутахассисон, Тоҷикистон низ бояд бо истифода аз имконияти илмӣ ва таҷрибаи байналмилалӣ ба ин раванд ҳамқадам гардад.

Масъалаи дигаре, ки ба рушди соҳа таъсири мустақим мерасонад, баланд бардоштани самаранокии иқтисодии истеҳсоли пилла мебошад. Имрӯз дар шароити рақобати бозорӣ танҳо зиёд намудани истеҳсолот кофӣ нест. Маҳсулоти истеҳсолшуда низ бояд дорои сифати баланд ва арзиши иқтисодии бештар бошад. Аз ин рӯ, риояи технологияи муосири парвариши кирмак, кам намудани талафоти истеҳсолӣ ва баланд бардоштани ҳосилнокӣ аз ҳар як қуттии тухми кирмак бояд ҳамчун вазифаи аввалиндараҷа муайян гардад.

Тибқи пешниҳоди мутахассисони соҳа, ҳосилнокии пилла аз ҳар як қуттии кирмак бояд ба сатҳи на кам аз 40 килограмм расонида шавад. Ин нишондиҳанда метавонад ба зиёд шудани истеҳсоли умумии пилла ва беҳтар гардидани вазъи иқтисодии хоҷагиҳои кирмакпарвар мусоидат намояд. Барои расидан ба чунин натиҷаҳо, пеш аз ҳама, бояд технологияи парвариш, сифати ғизодиҳӣ, шароити нигоҳдорӣ ва сатҳи омодагии кирмакпарварон беҳтар карда шавад.

Маблағгузории «Барномаи рушди соҳаҳои кирмакпарварӣ ва коркарди пилла барои солҳои 2026-2030», асосан, аз ҳисоби сармоягузории бахши хусусӣ, грантҳо, маблағҳои шарикони рушд ва дигар манбаъҳои иҷозатдодашуда пешбинӣ шудааст. Дар умум, маблағгузории барнома 59,1 миллион сомониро ташкил медиҳад. Тибқи нақша 65,8 фоизи маб­лағгузорӣ аз ҳисоби бахши хусусӣ ва 34,2 фоиз аз ҳисоби шарикони рушд таъмин мегардад. Ин шакли маблағгузорӣ имкон медиҳад, ки барои рушди соҳа танҳо ба маблағҳои давлатӣ такя карда нашавад, балки имконияти сармоягузории дохиливу хориҷӣ, иқтидори корхонаҳо ва ташаббусҳои соҳибкорӣ низ истифода гарданд.

Дар маҷмуъ, эҳёи соҳаи кирмакпарварӣ масъалаи танҳо истеҳсоли пилла нест. Ин соҳа метавонад ба як бахши муҳими иқтисоди миллӣ табдил ёфта, ҳамзамон, ҳифзи мероси фарҳангӣ, рушди ҳунарҳои мардумӣ, таъсиси ҷойҳои нави кор ва афзоиши содироти маҳсулоти тайёрро таъмин намояд.

Фархунда АБДУЛҲАКИМОВА,

«Садои мардум»

Тибқи гуфтаи ӯ, дар деҳоти Пӯлотони шаҳр сокинону соҳибкорон бо мақсади дастгирии соҳаи маориф фаъолнокӣ зоҳир намуда, бо бунёди мактабу кӯдакис­тонҳо барои тарбияи насли наврас шароити мусоид фароҳам меоранд.

Ҳоло дар шаҳри Конибодом бунёди 3 муассисаи таҳсилоти миёнаи умумӣ, ҳар кадом барои 350 хонанда дар як баст, идома дорад. Илова бар ин, бо саҳми мақомоти иҷроия ва соҳибкорон сохтмони 4 муассисаи дигар, ҳар кадом барои 320 хонанда, оғоз гардидааст.

Таҷдиду муҷаҳҳазсозии боғи фарҳангию фароғатии шаҳри Конибодом низ аз ҷумлаи иқдомҳои муҳим маҳсуб меёбад. Дар доираи марҳилаи дуюм дар боғи мазкур 10 аттраксиони муосир насб гардида, ҳамчунин, нуқтаҳои истироҳату фароғат, фурӯши хӯрокворӣ ва майдони баргузории чорабиниҳои фарҳангӣ ба фаъолият оғоз намудаанд. Ин тадбирҳо шароити фароғатии сокинонро беҳтар намуда, пеш аз ҳама, боиси хушҳолии кӯдакон гардидаанд.

Нодир ТУРСУНОВ,

«Садои мардум»